4. Ilaqutariit isertitaat

Ilaqutariinni atuinerat pingaarnertut uuttuutaasinnaavoq. Ilaqutariit isertitaat innuttaasut atuisinnaanermut periarfissaannut misissueqqissaarnermi tulluartuummata. Ilaqutariinni assigiinngitsunik annertussusilinni ilusilersorsimasunilu isertitat sanilliussinnaajumallugit isertitanut atoriaannaat annertussusaat atornerpoq.

 

Ilaqutariinni isertitaqartut tamakkerlutik isertitaat naatsorsuutini tunngavigineqarput, tassani ilaqutariit tamarmik minnerpaamik ataatsimik akileraartartumik ukiullu naanerani 15-inik ukioqalereersimasumik kiisalu ukiup aallartinnerani naaneranilu Kalaallit Nunaanni najugaqarsimasumik peqartariaqarput.

 

2021-p naanerani Kalaallit Nunaanni ilaqutariit 31.169-it nalunaarsorsimapput. Taakkunannga ilaqutariit 28.268-it qulaani piumasaqaatinik naammassinnissimapput. 2021-mi ilaqutariit isertitaannut naatsorsuutini pineqartut tunngaviliisuupput.

 

Takussutissiaq 4.1 Agguaqatigiissillugu ilaqutariit isertitaat. 2021

	Isertitat katillugit	Isertitat akileraarutaasussat	Isertitat atoriaannaat	Isertitat atoriaannaat annertussusaat
	1.000 kr.
Nuna tamakkerlugu .......	409	394	265	188
Kommune Kujalleq ........	326	307	217	159
Kommuneqarfik Sermersooq .	475	465	300	215
Qeqqata Kommunia .......	403	383	265	188
Kommune Qeqertalik ......	327	308	219	155
Avannaata Kommunia .....	365	346	241	165
	Najugaqarfik
Illoqarfinni ...............	424	409	273	194
Nunaqarfinni .............	296	278	204	143
	Ilaqutariit
Aappariit.................	672	653	425	233
Kisermaat ...............	265	252	177	164
	Ilaqutariinni meeqqat amerlass.
Meeraqanngitsut .........	341	330	222	191
Meeraq 1 ...............	512	491	330	191
Meeqqat 2 ..............	635	613	401	189
Meeqqat 3 amerlanerusullu .	614	571	405	155

Najoqqutaq: https://bank.stat.gl/INNFI101

 

Takussutissiaq 4.1. malillugu ilaqutariit isertitaannut kisitsisitigut paasissutissat najugaqarfiit malillugit inuit isertitaannut assigusumik inissisimapput. Kommuneqarfik Sermersuumi ilaqutariit isertitaat kommuninut allanut sanilliullugit qaffasinnerungaatsiarput, nalinginnaasumik aamma illoqarfinni nunaqarfinniit ilaqutariit isertitaat qaffasinnerupput.

 

Najugaqarfinni isertitat agguataarneqarneri – tupinnanngitsumik – ilaqutariit isertitaasa qaffakkiartornerat takutippaat, ilaqutariinni inuit amerlanerujartortillugit isertitat qaffakkiartortarput. Aappariit – agguaqatiissillugu – kisermaanit annertunerusunik isertitaqarput. Assiganik isertitat annertunerulersarput – ass. Meeqqanut tapinik peqquteqartumik – ilaqutariit ataatsimik imaluunniit marlunnik meerartaqarpata.

 

Ilaqutariit pingasunik imaluunniit amerlanerusunik meerartallit ilaqutariinnit marlunnik meerartalinnit appasinnerusunik akileraarutaasussanik isertitaqarput. Taamaattorli ilaqutariit pingasunik amerlanerusunilluunniit meerartallit isertitaat atoriaannaat qaffasinnerupput. Ilaqutariit pingasunik imaluunniit amerlanerusunik meerartallit akileraarutaasussaanngitsunik ikiorsiissutinik ass. Meeqqanut tapinik annertunerusunik ikiorserneqartarnerinik tamanna takutitsivoq.

 

Ilaqitariinni inuit arfinillit isertitaat tamakkiisut imaluunniit isertitaat atoriaannaat kisermaamut meeraqanngitsumut sanilliutissallugit naapertuutinngilaq. Ilaqutariit arlalinnik inuttallit ilaqutariinnit ikittuinnarnut inulinnit annertunerujussuarnik isertitaqarnerusariaqarput, taakkununnga assigusumik atuisinnaanermut periarfissaqassagunik.

 

Akerlianilli ingerlatsinermi iluaqutissartaqarsinnaavoq, tassani ilaqutariit amerlanerusunik inuttallit inummut ataatsimut agguaqatigiissillugu kisermaat isertitaasa annertoqataannik assigusumik atuisinnaanermut periarfissaqarniarlutik isertitaqartariaqanngimmata. Assersuutigalungu ilaqutariit arfinilinnik inuttallit arfinilinnik nillataartitsiveqartariaqanngillat imaluunniit arfinilinnik pisattanut qularnaveeqquteqartariaqaratik.

 

Ilaqutariit assigiinngitsut akornanni isertitat sanilliussinnaaniarlugit isertitat annertussusilerlugit uuttuutilerneqarput, assersuutigalungu isertitat atoriaannaat annertussusaat kisinneqarsinnaasunngorlugit, takuuk takussutissiaq 4.2. Kapitali 7-ini immikkoortoq 7.8-mi isertitat atoriaannaat annertussusaannut kisitsineq pillugu atuartoqarsinnaavoq.

 

Takussutissiaq 4.2 Agguaqatigiissillugu isertitat annertussusaat. 2021

	Isertitat atoriaannaat	Annertussusaannut uuttuut	Isertitat atoriaannaat annertussusaat
	1.000 kr.		1.000 kr.
Kisermaat meeraqanngitsut .......	171	1,0	170
Kisermaat ataatsimik meerallit  ....	196	1,4	140
Kisermaat marlunnik meerallit  .....	219	1,8	125
Kisermaat pingasunik amerlanerusunilluunniit meerallit ....	233	2,2	106
Aappariit meeraqanngitsut ........	388	1,5	258
Aappariit ataatsimik meerallit ......	447	1,9	235
Aappariit marlunnik meerallit .......	472	2,2	213
Aappariit pingasunik ameranerusunilluunniit meerallit ....	450	2,7	167

Najoqqutaq: https://bank.stat.gl/INNFI101

 

Isertitat atoriaannaat annertussusaannik kisitsinermi isertitat ilaqutariit ataasiakkaat iluini agguataarneqarput. Ilaqutariinni inuit tamarmik – aamma meeqqat – isertitat atoriaannaat annertussusaannik naatsorsuiffigineqarput, ilaqutariinni ataasiakkaat qanoq annertutigisunik isertitaqarnerat apeqqutaatinnagu. Taamaasilluni isertitat annertussusilerneqarneranni ilaqutariinniittut tamakkerlutik atuisinnaanermuit naligiimmik periarfissinneqarlutik.

 

Takussutissiaq 4.2-mi takutinneqareersutut aappariit isertitaasa atoriaannaat annertussusaat suli qaffasinnerpaavoq. Taamaattoq aappariit kisermaallu akornanni isertitat nikingassutaat annikinnerulersimavoq. Ilaqutariinnilu meeqqat amerliartortillugit ilaqutariit isertitaasa atoriaannaat annertussusaat annikilliartortarpoq. Ilaqutariinnilu inuit aningaasaqarnikkut tapertaasinnaasut amerliartortillugit isertitat atoriiaannat qaffakkiartortaraluartoq isertitat atoriaannaat annertussusaat annikilliartortarput. Tamanna ilaqutariinni arlalinnik inulinni meeqqat 14-it sinnerlugit ukiullit amerlanerusarnerannik peqquteqarpoq, annertussusiinnermi anginersumik uuttuuserneqartamata, ilaqutariinniillu 14-inik ukioqalersimanngitsunik meerartalinnik isertitaannut atoriaannarnut annikillisaataallutik.

 

Ilaqutariinni meeqqat amerliartortillugit ilaqutariit atuisinnaanermut periarfissaat annikinneruleriartortarnerannik tamanna, takutinneqareersutut, isumaqarpoq.